पालघरमध्ये परदेशी नागरिकांची फसवणूक करणारी टोळी गजाआड, ५ आरोपी अटकेत

पालघर पोलीस यांनी आंतरराष्ट्रीय स्तरावर परदेशी नागरिकांची फसवणूक करणाऱ्या बनावट कॉल सेंटरचा पर्दाफाश करत मोठी कारवाई केली आहे. पालघर पश्चिमेतील मौजे माहिम परिसरात एका रहिवासी इमारतीत अनधिकृतरित्या बोगस कॉल सेंटर चालवले जात असल्याची गोपनीय माहिती स्थानिक गुन्हे शाखेला मिळाली होती.

या कारवाईत पाच आरोपी रंगेहाथ आढळून आले. तपासात आरोपी अमेरिकेतील नागरिकांची वैयक्तिक माहिती बेकायदेशीररित्या मिळवून स्वतःला मायक्रोसॉफ्ट व अॅपल कंपनीचे प्रतिनिधी म्हणून ओळख देत होते. “तुमच्या डिव्हाईसमध्ये व्हायरस आहे” अशी भीती दाखवून गिफ्ट कार्ड खरेदीस भाग पाडले जात होते.

फसवणुकीतून मिळालेली रक्कम डिजिटल चलनात रूपांतरित करून हवालामार्गे रोख स्वरूपात घेतली जात होती, असा धक्कादायक प्रकार तपासात उघड झाला आहे.